Chantada

A situación xeográfica do municipio preséntao como “o corazón de Galicia” e posúe variedade de paisaxes mesturándose a montaña e a ribeira. Entre os seus atractivos engadiriamos un impresionante e abundante Patrimonio Histórico Artístico onde o románico está presente en gran medida.

A orixe do nome de Chantada moitos autores lígano a “Plantata”, probablemente en relación cunha antiga fortificación defensiva.

O seu casco antigo conserva soportais tradicionais, especialmente na Rúa do Comercio.

Desde a praza de Santa Ana iniciariamos un percorrido, que nos levaría pola Rúa Leonardo Rodríguez, Rúa do Comercio … para chegar á Praza do Cantón onde aseñora o Casarío de Lemos, restaurada por Gallego Jorreto e que actualmente alberga a Oficina Municipal de Turismo, a Biblioteca e Salas de Exposicións.

Na devandita praza atópase a “igrexa vella”, antiga Igrexa Parroquial onde se venera entre outros a Santa Mariña, e que nos anos oitenta substituíuse pola moderna igrexa situada na Rúa Xoán XXIII, aínda que a antiga segue en funcionamento.

Nesta praza merece a nosa atención a tipoloxía de vivenda tradicional, cos seus balcóns de madeira e galerías. Ao fondo atopamos a Casa do Concello actual, antigamente Prisión Municipal, especialmente animada todos os días 5 e 21 de cada mes, días de feira en Chantada. Os produtores locais enchen a praza de ovos, pitos, coellos, queixos, verduras, noces … que achegan da zona de ribeira, normalmente favorecida por un clima máis benigno.

Se continuamos descendendo cara á Alameda atoparémonos co Paseo Fluvial do río Asma, no cal se restaurou un vello muíño tradicional que nos remite tamén a un aspecto cultural moi importante para os chantadinos: a súa famosa “Muñeira de Chantada”. De recente construción, o paseo condúcenos á  área recreativa de O Sangoñedo, onde ademais de parques infantís nunha preciosa contorna natural atópase o Campo de Fútbol Municipal.

Non podemos esquecer que cruzando o Asma no Barrio de A Ponte divísase o Mosteiro de San Salvador de Asma, verdadeiro artífice do progreso local da vila. Nel consérvase a igrexa románica do século XII, ademais de posuír no seu interior un fantástico retablo e artesoado ligado á Casa Nai de Valladolid. Moi próximos estarían o Mercado Gandeiro e a Estación de Autobuses.

Fóra da capitalidade, Chantada conta tamén con bos exemplos do románico coma: Santa María de Pesqueiras, San Salvador de Asma ou Santa María de Camporramiro ou Santa María de Nogueira, entre outros.

Tamén poderá o visitante percorrer o chamado Camiño de Inverno, tramo do camiño de Santiago que ao seu paso por Chantada discorre por unha antiga calzada romana, na fermosa aldea de Belesar