PR-G 249 Camiño Vello de Aldosende

Iniciando o sendeiro en Aldosende, o camiño cruza a aldea de Touro, para descender cara ao val do río Miño. Antes de chegar a ribeira do Miño o sendeiro percorre o canón do Rego da Trapa. Neste tramo o camiño foi escavado na pedra e existe un desnivel moi importante cun risco de caídas elevado. Tamén se atopan varios tramos de escaleiras en pedra colocadas cando se construíu o camiño orixinal.

O sendeiro cruza o rego da Trapa por unha pontella de formigón e inicia o percorrido pola beira do Miño nun tramo sinxelo e sen pendente no que hai en todo momento moi boas vistas sobre o río.

Este tramo remata ao chegar ata o complexo de San Facundo de Ribas de Miño, formado polo templo parroquial e unha casa reitoral anexa. O conxunto foi declarado monumento de interese nacional e recibiu o primeiro premio do Colexio de Arquitectos de Galicia como o mellor proxecto de restauración realizado na Comunidade Autónoma.

O sendeiro continúa por un camiño de carro con muros as beiras, entre viñedos e leiras ata chegar o lugar da Adega dos Penedos. Neste lugar atópanse varias construcións en ruínas e algunhas mostras da etnografía da zona: pías na pedra, eiras, restos dun carro de eixo e dun tear, etc. Atópase ademais nun promontorio sobre o río Miño o que permite unhas boas vistas do entorno.

O tramo final percorre unha carballeira ata chegar a aldea de Santa Marta, onde poderemos visitar a capela e continuar ata o miradoiro de Cabo de Vila onde remata o sendeiro.