Feiras do viño de Amandi e Quiroga 2019

FEIRA DO VIÑO DE AMANDI 2019 (13 e 14 de abril)

É outra das citas importantes co viño de Ribeira Sacra que ten lugar durante o sábado e o domingo de Pascua.

O recinto feiral, na Praza do Concello, énchese da música da banda de música de Sober, unha das máis antigas de Galicia, e un dos símbolos da localidade de Sober, para amenizar este gran encontro en torno ao viño de Amandi (subzona da D.Ou. Ribeira Sacra). A cita serve, ademais, como escusa para mostrar a contorna da zona e o seu modo de vida, centrado na viticultura pero tamén na olería, coa veciña parroquia de Gundivós como produtora. Un achegamento aos postos de artesanía na feira bastará para comprobar a relevancia que teñen as pezas desta antiquísima olería pola súa utilidade nas labores viticultoras.

Os adegueiros de Amandi dan a probar aquí o seu viño mencía, abanderado dos tintos galegos, e os visitantes teñen a oportunidade de catalos xunto con outros excelentes produtos, tamén á venda, como queixos e pan, mel da Ribeira Sacra e as roscas de doce de Millán, estes últimos moi apreciados pola súa calidade.

A festa, declarada de Interese Turístico, reúne a milleiros de persoas e pon de relevo a importancia da actividade vitivinícola na zona, así como o impulso e o prestixio dun viño que, segundo contan as lendas era levado á Roma dos césares e cultivábase desde os tempos en que se asentaron as ordes monásticas na Ribeira Sacra, en terrazas polas fortes pendentes das ladeiras dos canóns do Sil. Unha orografía que dificulta moito o traballo nas vides, razón pola que esta viticultura é chamada “heroica”.

Máis información aquí.

FEIRA DO VIÑO DE QUIROGA 2018 (20 e 21 de abril)

Certame de exaltación dos viños desta terra que ten lugar durante o sábado e domingo de Pascua.

A feira do viño de Quiroga convértese cada ano nun excelente escaparate da produción vitivinícola da Ribeira Sacra. Desde hai máis de 30 anos o Concello de Quiroga organiza unha exaltación dos seus afamados caldos na que participan aqueles colleiteiros que elaboran os seus viños aínda dunha forma artesanal. Os postos de venda e mostra instálanse nun tramo da Rúa Real, acompañados por puntos de venda de todo tipo de produtos típicos artesanais da zona: mel, aceite, augardente, licores, castañas secas, etc.

Milleiros de visitantes achéganse a Quiroga para gozar dos seus viños e poder asistir á propia celebración e ás numerosas actividades paralelas que se organizan, como exposicións, carreira popular, concertos, alboradas…

Co tempo converteuse nunha das feiras máis importantes da zona, xunto coas de Amandi e Chantada.

Máis información aquí.