Igrexa de Santa María de Torbeo

No ano 1936, un incendio destruíu a igrexa e foi restaurada en 1945. Conserva a planta primitiva, aínda que modificada cando se lle engade a sancristía no século XVI, e as dúas capelas laterais no século XVIII, de tamaño reducido. Ten unha soa nave rectangular, de gran sobriedade, e unha ábsida semicircular. A fachada está coroada por unha espadana.

No interior, o arco de acceso ao presbiterio é apuntado. Está decorado por unha moldura exterior ou chambrana axadrezada. O arco menor descansa sobre capiteis con decoración figurada. Á dereita pódense ver dous leóns rampantes enfrontados e no centro, o Cristo na mandorla. Á esquerda, dous leóns cun arbusto no medio.

Interesante é a pía bautismal do século XII, realizada en granito. Ten 120 centímetros de diámetro e pesa arredor de 800 quilogramos. É un dos poucos exemplares de pías de inmersión que se conservan en Galicia. Está decorada con motivo xeométrico e un salmón, xa que ten catro aletas. Poida que simbolice a resurrección, xa que o salmón remonta os ríos para deixar descendencia antes de morrer. Ten unha inscrición en latín que significa “sen mancha do pecado orixinal”.

O exterior da ábsida presenta unhas ventás completas con arco de medio punto apoiadas sobre columnas e con moldura de axadrezado.