Igrexa San Xillao de Lobios

Presenta unha soa nave rectangular con teitume de madeira e unha cabeceira rectangular, estruturada en tramo recto presbiteral e capela maior de testeira recta.

No interior, o tramo presbiteral cóbrese con bóveda de crucería apoiada sobre ménsulas-capitel, elemento estrutural característico da arquitectura tardorrománica galaica.  Nas catro ménsulas aparece esculpido o Tetramorfos segundo a visión de Ezequiel. Se miramos de fronte ao altar, á esquerda aparece o touro de San Lucas e o león de San Marcos. Á dereita, a aguia de San Xoán e o anxo de San Mateu.  Estas figuras foron realizadas por mans distintas, xa que podemos observar diferenzas na técnica. Nas representacións de San Lucas e San Marcos percíbense maiores destrezas. O artista coida o modelado dos corpos con formas redondeadas. No caso de San Xoán e San Mateu observamos que o artista era menos habilidoso, xa que a labra é máis basta.

Destacan tamén as pinturas murais do século XVI, que fan referencia ao Xuicio Final.

No exterior destacamos a súa portada sur. Presenta un abucinamento moi marcado. As arquivoltas apóianse sobre capiteis con interesante iconografía. É unha confrontación entre o ben e o mal. A imaxe do mal témola representada nos centauros e o dragón, animais fantásticos. A imaxe do ben témola representada nas aves e San Miguel. Mirando de fronte á esquerda, en primeiro lugar vemos os centauros que simbolizan a luxuria e a soberbia. No centro, un capitel con decoración vexetal. A continuación temos a alusión á alma fiel representada nas aves, que poden tratarse de pombas, ave positiva que identifica ao Espírito Santo e é a imaxe das virtudes cristiás. Á dereita, en primeiro lugar, atopamos a representación de San Miguel matando ao dragón, ao que vence. Seguidamente outro capitel con decoración vexetal, e por último, o dragón que representa a Satán, rei dos infernos.

A portada principal é similar á sur. A decoración dos seus capiteis é vexetal. Sobre a portada pódese ver unha fermosa ventá con dous vans, arco apuntado e decoración con bólas e cunchas de vieira.

Conserva tapiada a porta norte que daba acceso ao claustro, con chambrana de axadrezado e decoración xeométrica e vexetal.