Igrexa de San Xoán da Cova

As primeiras mencións documentais das que temos constancia en relación con esta igrexa datan do século X. Os devanditos rexistros fan referencia á existencia dun antigo mosteiro na Cova, o cal pasou a ser exclusivamente feminino a principios do s. XII, albergando unha comunidade de monxas beneditinas. Este é o momento no que ten lugar a construción do edificio románico. É importante ter en conta que, do mesmo xeito que no caso na veciña igrexa de Santo Estevo de Chouzán, o templo atópase na actualidade desprazado da súa localización orixinal por motivo da construción da presa de Os Peares. Ambos os casos suporán unha experiencia moi valiosa en relación ao posterior traslado da igrexa de San Nicolao de Portomarín. Nos tres casos citados os proxectos de desprazamento e reconstrución foron dirixidos polo arquitecto Francisco Pons Sorolla.

A fachada occidental componse dunha porta formada a partir dun arco de medio punto que alberga tres arquivoltas e cuxo tímpano conta cunha inscrición en agradecemento ao soldado Pedro García pola súa contribución para as obras de construción do templo. Pola súa banda, os capiteis destacan por amosar unha decoración vexetal de nervios moi marcados.

Sen dúbida, algúns dos elementos de maior relevancia atópanse no muro norte. En primeiro lugar, destacamos unha porta que pertenceu en orixe á antiga capela anexa que non foi recolocada tras o traslado. Presenta unha disposición a partir dun arco lixeiramente apuntado sustentado sobre dous pares de columnas decoradas con entrelazos e elementos de inspiración vexetal. De igual modo, chama a atención a presenza dun sepulcro exterior baixo arcosolio coa estatua xacente da nai abadesa do mosteiro.

Con respecto ao interior, como elementos máis singulares é posible destacar as dúas pilas, bautismal e de auga bendita, ambas de época medieval, datadas en torno ao século XIII.

Esta igrexa de San Xoán da Cova foi declarada Monumento Nacional en 1950, data anterior ao seu traslado que asegurou a súa supervivencia como igrexa da Diocese de Lugo.

Podes facer unha visita virtual en 360º premendo aquí.

Fonte: Diocese de Lugo