Cómo chegar 
16.9.a Peares – Porto do Bao
Sendo os ríos tradicionalmente elementos utilizados para marcar os lindes entre distintos territorios, parece evidente que nun lugar onde se xuntan os dous principais ríos galegos, Miño e Sil, ademais do Búbal, a complexidade está servida.
Se ao anterior engadimos que Os Peares foi un lugar moi próspero economicamente, atopamos a explicación ao crecemento en toda as direccións a carón dos tres ríos. Isto deu lugar a que contemos cunha poboación que pertence a 2 provincias (Lugo e Ourense), 3 partidos xudiciais (Chantada, Monforte de Lemos e Ourense) e 4 concellos (A Peroxa, Carballedo, Nogueira de Ramuín e Pantón).
Lonxe de ser anecdótica, esta diferenciación provocou moitas problemáticas relacionadas cos servizos de saúde, colexios, liñas telefónicas ou recibir paquetes.
En 1999 constituíuse o Consorcio Local dos Peares, creado polas distintas administracións para facilitar todas estas tarefas administrativas, coordinar inversións ou organizar o desenvolvemento urbanístico. A súa sede, xunto co centro de saúde, atópase no moderno edificio branco que podemos ver ao outro lado do río.
E neste mesmo punto atopamos a praia fluvial dos Peares, un espazo de ocio que aproveita as augas do Búbal e é punto de encontro na época estival.
