Mural "Xoias da Ribeira Sacra II - Pebida de Ouro"

Situado no trazado do Camiño de Inverno, ao seu paso por Quiroga. É a segunda obra do recoñecido artista Mon Devane en Ribeira Sacra.

Do mesmo xeito que co primeiro mural desta serie (Xoias de Ribeira Sacra I - Perlas vermellas), o artista quixo homenaxear aos produtos gastronómicos máis relevantes desta zona de Ribeira Sacra, representándoos en forma de xoia. En Quiroga, como non podía ser doutra forma, o elemento escollido foi a oliva.

Aínda que nun primeiro momento poida parecer estraño, o cultivo da oliva en Ribeira Sacra practicouse, probablemente, desde a chegada dos romanos. Con todo, por diversos motivos, estas plantacións foron desaparecendo en gran parte do territorio, manténdose unicamente na zona máis oriental de Ribeira Sacra. Mostra desa tradicional produción son as oliveiras centenarias que podemos atoparnos en Quiroga, así como a conservación das dúas únicas variedades autóctonas recoñecidas en Galicia: a Brava galega e a Mansa galega.

Obra realizada por Mon Devane en agosto de 2021, dentro das actuacións do Pacto pola Paisaxe na Ribeira Sacra.