Sobreira da Casa do Tristo

O seu tronco aseméllase a un birlo que foi crecendo aos poucos, debido probablemente a unha enfermidade bacteriana motivada por feridas producidas no descortizado ao longo dos anos.

É ben sabido que o descortizado da sobreira é unha operación certamente delicada, pois se deixa á árbore desprovista da cortiza que protexe a parte viva, apenas uns pequenos milímetros onde se atopan os tecidos condutores de zume, e debido a iso a sobreira protéxese producindo taninos de cor avermellada alaranxada. A produción dunha nova cortiza, xeralmente, cústalle á árbore entre 7 e 9 anos. Algunhas sobreiras morren no intento, polo que se debe realizar con coidado e sen producir dano, con instrumentos especiais e persoal experto.

Afortunadamente para esta árbore, fai corenta anos que non se lle aproveita o “cortizo”, pois pola forma e o tamaño que ten converteuse nun monumento.
 

Datos da árbore (2020): 

• Altura (m): 15.2
• Perímetro normal (m): 10.85
• Diámetro de copa (m): 15.21
• Idade estimada: 250-500 anos

Fotografías: Xoán Fraga