Ruta 2 - Trail Running Center Castro Caldelas

Esta ruta levaranos ata o punto máis alto do concello, A Pena da Cruz, a 1.200 m de altitude.

Primeiro, descenderemos xunto á igrexa e ruínas do mosteiro de San Xoán de Camba ata o río Edo para, despois, ascender por camiños e pistas xunto á aldea abandonada de Piñeira e máis adiante ata O Burgo, onde nos atoparemos coa igrexa románica da Asunción do Burgo. 

A partir dese punto, continuaremos pola milenaria Vía Nova romana, paralelos á Serra do Burgo, entre prados e muros de pedra ata Casmartiño, onde empezaremos o ascenso á serra pasando polas aldeas de Filgueiras e Portela. Tras un tramo de subida suave comeza un cortalumes que ascende 300 m de desnivel en 2 km, para gozar das vistas e comezar un descenso pronunciado intercambiando paisaxes de montaña con grandes rocas, zonas de bosques e pistas ata chegar ás ribeiras do Edo, que nos traerán xunto ao río por zonas de bosques de ribeira e antigos muíños de fariña ata o último ascenso a Castro Caldelas.