Castelo de Castro Caldelas

No centro da vila de Castro Caldelas atopamos o seu castelo, que pertenceu aos Condes de Lemos para defender os seus dominios. Aínda que se pode chegar en coche ata as súas inmediacións, é aconsellable deixalo na Praza do Prado, e subir camiñando polo casco antigo.

Aínda que parece que o castelo ocupa o lugar dunha construcción anterior, o actual foi erixido no século XIV por D. Pedro Fernádez de Castro. Como a maior parte dos castelos galegos, a mediados do século XV foi destruído parcialmente durante a Revolta Irmandiña, e reconstruído posteriormente.

Conserva unha doble muralla. Os seus muros son de gran grosor. A muralla exterior ten adosadas tres torres. A muralla interior está rematada con almenas.

Accedemos ao castelo a través dunha porta na que podemos ver os escudos dos Condes de Lemos (á dereita os lobos dos Osorio; á esquerda, na parte superior, castelo e león rampante dos Enríquez, e na inferior os seis roeles dos Castro). Á esquerda da porta pódese ver unha reprodución dunha catapulta. Nada máis entrar atopámonos co patio de armas. Ao fondo atópase o alxibe (sistema de recollida de auga de chuvia para o uso do castelo) e ao seu lado un forno alfareiro. Desde eiquí pódese subir ao paseo de ronda da muralla interior. Ao finalizar as escaleiras atópase a Torre do Reloxo, que é a máis antiga. Conserva a maquinaria que pon en marcha o reloxo. A Torre da Homenaxe está defendendo a porta principal. Era símbolo de poder señorial e o último reducto no caso de asedio. Desde a terraza pódese ver unha fermosa vista do val do Sil.

No século XVI refórmase en palacio cun gran salón. Nos seus muros abríronse ventás con parladoiros e construíuse un gran corredor.

Durante a Guerra da Independencia, en 1809, os veciños prendéronlle lume, en represalia contra os franceses.

No século XVIII, o Condado de Lemos, pasa por lonxano parentesco á Casa de Alba. O edificio estivo habitado ata o século XIX por Sol Stuart, parente dos Duques de Alba.

No 1991, foi cedido en usufructo ao Concello de Castro Caldelas, convertíndose no centro cultural de toda a comarca. No seu interior alberga a oficina de turismo, a biblioteca municipal, un salón de actos e o museo etnográfico.