Día 2 - Ruta dos mosteiros
Con este percorrido poderás coñecer os mosteiros situados nas ribeiras do río Sil, así como o único mosteiro que aínda conserva vida monacal en Ribeira Sacra. Este itinerario forma parte dunha ruta de 2 días, na cal se visitan todos os mosteiros que se conservan en Ribeira Sacra.
A nosa ruta comezará co mosteiro de San Salvador de Ferreira de Pantón, popularmente coñecido como mosteiro das Bernardas. Na actualidade, é o único mosteiro que permanece aínda habitado en Ribeira Sacra. Non te podes marchar sen probar os marabillosos doces que elaboran! ;)
Trala visita ao mosteiro das Bernardas, dirixirémonos ao de Santo Estevo de Ribas de Sil, o mosteiro máis impoñente de Ribeira Sacra. A súa grandiosidade deixaranos ver a importancia que chegou a ter estes conxunto séculos atrás. Hoxe en día está convertido en Parador Nacional de Turismo e pódense visitar os seus tres claustros e a igrexa; tamén, a zona traseira do bosque, onde albergaban o antigo matadoiro e fornos.
Para chegar ao mosteiro de Santo Estevo, desde Ferreira de Pantón, teremos dúas opcións:
- A máis curta: sairemos do núcleo do pobo coma se fósemos tomar a N-120, pero antes de chegar á incorporación, desviarémonos a man esquerda en dirección Santo Estevo. Tras cruzar o río Sil á altura da Barxa, viraremos á esquerda, seguindo as indicacións para o catamarán. Continuaremos por esa estrada, sen desviarnos, ata que chegue ao seu fin, no pobo de Loureiro. Aí, viraremos á dereita e seguiremos as indicacións para o mosteiro.
- A estrada en mellor estado: sairemos de Ferreira de Pantón cara a N-120 en dirección Ourense. Tras pasar a localidade de Os Peares, desviarémonos a man esquerda en dirección Penalba/Luintra/Mosteiro de Santo Estevo. Desde aí está perfectamente sinalizado (haberá que seguir os sinais que indican "PARADOR").
Unha vez rematemos a visita en Santo Estevo, volveremos sobre os nosos pasos ata a estrada principal e continuarémola uns metros (en dirección Luintra) ata atoparnos cun cartel que indica "Paradela" a man dereita; desviarémonos e aparcaremos. Continuaremos camiñando uns 300 metros ata o miradoiro de Penedos do Castro. Desde aquí, poderemos observar a localización do mosteiro de Santo Estevo, na ladeira do Canón do Sil. Ao fondo, tamén poderemos apreciar a Ponte da Barxa e, nese mesmo punto, a desembocadura do río Cabe no Sil.
Regresamos á estrada principal, aínda que esta vez en sentido contrario, é dicir, en dirección Parada de Sil. De camiño, atoparémonos co miradoiro de Cabezoás. Desde alí teremos unha fantástica panorámica sobre o último meandro do Sil antes da presa de Santo Estevo.
Continuamos en ruta na mesma dirección ata chegar ao núcleo do concello de Parada de Sil. Alí, atoparemos a sinalización para chegar ao seguinte mosteiro, Santa Cristina de Ribas de Sil (necesaria reserva con antelación en https://turismo.ribeirasacra.org/gl/reservas). Santa Cristina é a xoia do románico por excelencia de Ribeira Sacra. Ademais, está situado nunha contorna privilexiada, completamente rodeado de castiñeiros e en plena ladeira do Canón de Sil.
Por último, volveremos ao pobo de Parada de Sil, para dirixirnos á última parada deste percorrido, o mosteiro de San Paio. San Paio está actualmente en ruínas, pero pódese visitar o seu exterior, onde aínda se poden observar restos da igrexa, do cemiterio e do antigo patio-claustro. Para chegar, teremos tamén dúas opcións:
- Desde Parada de Sil, tomamos a OU-0604 ataVilariño Frío. Aí, viraremos á esquerda pola OU-536 en dirección Castro Caldelas/Trives. E ao chegar a Castro Caldelas, viraremos á esquerda pola LU-903 en dirección A Teixeira. A poucos quilómetros atoparémonos o desvío cara á Teixeira, o cal nos levará ao mosteiro.
- Desde Parada de Sil, tomamos a OU-0605 en dirección A Teixeira. Polo camiño, poderemos facer parada noutros lugares como o castiñeiro milenario de Entrambosrríos, as pasarelas do río Mao, a aldea de Cristosende ou as Fervenzas do Cachón (esta opción é só aconsellable para épocas con máis horas de luz).
OBSERVACIÓNS
- Se seguimos as indicacións en canto a tempos e comezamos o roteiro coincidindo co horario de apertura do mosteiro de San Salvador, tanto se xantamos en Luintra, no Parador ou en Parada de Sil, deberemos reservar a entrada para o mosteiro de Santa Cristina ás 16:00 horas.
OUTRA INFORMACIÓN DE INTERESE
ONDE COMER · Preme aquí para descubrir os restaurantes máis próximos ao punto no que te atopes nese momento (poderás filtrar por concello).
MÁIS RECURSOS · Se queres completar o percorrido con outros recursos próximos ao punto no que te atopes, utiliza o mapa interactivo, seleccionando na procura o concello no que te sitúes nese momento (opción recomendada soamente para épocas do ano nas que hai abundantes horas de luz).
![Mosteiro de San Salvador de Ferreira](/cgmlImg/164-awotnpk/pasoImgMin/Monasterio_Bernardas_de_Ferreira.jpg)
![Historia](/cgmlImg/772-aovjthi/typeIconCategory_gastronomiaVino/roseton-light_fdmi772.png)
Único mosteiro de Ribeira Sacra que mantén vida relixiosa, tamén coñecido como Mosteiro das Bernardas.
![Mosteiro de Santo Estevo de Ribas de Sil](/cgmlImg/3568-acadekx/pasoImgMin/mosteiro_retocada_.jpg)
![Historia](/cgmlImg/772-aovjthi/typeIconCategory_gastronomiaVino/roseton-light_fdmi772.png)
O mosteiro de Santo Estevo de Ribas de Sil é un dos conxuntos máis destacados e espectaculares do rico patrimonio monumental de Galicia. Foi construído entre os séculos XII e XVIII.
![Natureza](/cgmlImg/21-anfrxvi/typeIconCategory_gastronomiaVino/naturaleza_fdmi21.png)
Neste lugar situábase antigamente un castro, localizado nun lugar estratéxico para a vixilancia e defensa. Hoxe en día, desde este miradoiro, podemos apreciar o mosteiro de Santo Estevo, nunha localización tamén privilexiada, no alto do Canón do Sil.
![Miradoiro de Cabezoás](/cgmlImg/125-akkeebu/pasoImgMin/RS_Mirador_de_Cabezoas.jpg)
![Natureza](/cgmlImg/21-anfrxvi/typeIconCategory_gastronomiaVino/naturaleza_fdmi21.png)
Cabezoás é un dos miradoiros máis populares de Ribeira Sacra, o que indica a súa relevancia nun territorio caracterizado pola abundancia e calidade de puntos de observación.
![Historia](/cgmlImg/772-aovjthi/typeIconCategory_gastronomiaVino/roseton-light_fdmi772.png)
NO VERÁN PROHÍBESE O ACCESO EN VEHÍCULOS PARTICULARES. É NECESARIA A RESERVA DE "COMBINADO MOSTEIRO+ BUS LANZADEIRA"
O mosteiro de Santa Cristina de Ribas de Sil está situado nunha paraxe espectacular no souto de Merilán.
![Historia](/cgmlImg/772-aovjthi/typeIconCategory_gastronomiaVino/roseton-light_fdmi772.png)
O mosteiro de San Paio, a pesar do seu estado de abandono, forma un interesante conxunto dentro de Ribeira Sacra. Algúns autores pensan que se funda no século X (no ano 934, a familia de San Rosendo aparece como propietaria destas terras). Con todo, para outros foi no século XII. A Desamortización de Mendizábal supuxo o abandono do mosteiro, aínda que a igrexa seguiu sendo parroquial. No ano 1872 cómprao a Casa de Alba. En 1972 clausúrase a parroquia.
Non o perdas!
Neste percorrido poderás incluír o paseo en catamarán pola mañá, despois da visita ao mosteiro das Bernardas, desde o embarcadoiro de Santo Estevo. No verán, tamén poderás facelo a última hora da tarde, desde os embarcadoiros de Ponte do Sil ou Abeleda.