Ruta 4 - Trail Running Center Castro Caldelas

A Ruta 4 ou Roteiro da Serra de Mazaira comparte o inicio coa R1, pasando pola igrexa e ruínas do mosteiro de San Xoán de Camba, e comparte tamén ascenso vertical á Serra do Sobredo, ruta en paralelo ao río Sobredo e aldeas da parroquia de Alais, pero desvíase ata a Serra de Mazaira xunto a Vilarello para adentrarse no Val de Tronceda de castiñeiros milenarios, ascendendo por Susaos á súa zona máis alta e descendendo por un cortalumes bastante técnico e unha zona de bosque de castiñeiros centenarios esvaradía ata o camiño que unía Carballeiras e Tronceda, con chanzos tallados, fervenzas, bosques de madroños e paraíso do musgo.

Dende Tronceda, descendemos polo camiño de misa por bosques pechados e camiños de muros de pedra centenarios para cruzar dous ríos e comezar o ascenso xunto á ermida de Santiago e os viñedos do val para chegar á Cova do Mario, antigo refuxio de Maquis. Logo, descenderemos en vertical ao río Paradela e ascenderemos pola antiga canteira ata a súa unión coa R3, coa que compartirá o resto do percorrido ata Castro Caldelas, polas Penas de Matacás, viñedos, descenso a Celeirón entre as viñas e ascenso en vertical ata os Bosques Máxicos.